Azərbaycan News Agency

Ukrayna Prezidenti Volodimir Zelenski Ukrayna Müdafiə Kəşfiyyatının rəhbəri Oleh İvaşçenkonun hazırladığı hesabatla bağlı məlumatları bölüşüb. Zelenski Rusiyanın daxili sənədlərinə əsasən təcavüzkar ölkənin bəzi ixrac kateqoriyalarının təkcə avqust ayında 80 faiz azaldığını bildirib.

Zelenski bu vəziyyətin Rusiyanın federal büdcəsi və daha əvvəl də iflas həddində olan regional büdcələr üçün əhəmiyyətli itkilərə səbəb olduğunu bildirib. O, Rusiya tərəfinin Ukraynanın pilotsuz uçuş aparatları ilə həyata keçirdiyi hücumlar nəticəsində Qara Dəniz Donanmasına məxsus gəmilərin Novorossiyskdə böyük ölçüdə bloklandığını və dənizdə fəaliyyət göstərə bilmədiyini etiraf etdiyini qeyd edib.

Zelenski Rusiyanın ticarət gəmilərini və müvafiq limanlara daxil olan kölgə donanmasını müşayiət edə bilməməsi səbəbindən nəzərdən keçirilən variantlar arasında mülki gəmilərin yüngül silahlar, elektron müharibə sistemləri və hərbi personal ilə təchiz edilməsinin də olduğunu bildirib. O, Rusiyanın dəniz nəqliyyatını hərbiləşdirməsinə qarşı müvafiq cavab tədbirlərinin hazırlanacağını qeyd edib.

Ukrayna Prezidenti Müdafiə Kəşfiyyatının Rusiyanın hərbi istehsal obyektlərinə və neft sənayesinə qarşı dərinlikdə həyata keçirilən zərbələrin yüksək effektivliyini təsdiqlədiyini bildirib. Zelenski Rusiya tərəfinin məlumatlarına əsasən Rostov vilayətindəki Kamenski zavoduna endirilən uzaqmənzilli zərbələrdən sonra Rusiyanın bərk yanacaqlı raket mühərriklərinin istehsal gücünün əhəmiyyətli hissəsini itirdiyini qeyd edib.

Zelenski Rusiyanın ballistik raket istehsalı və bu istehsalı artırmaq planları barədə də aktual məlumatlar əldə etdiklərini bildirərək, buna qarşı tədbirlər görüləcəyini vurğulayıb. O, raket istehsalında istifadə olunan komponentlərin, avadanlıqların və dəzgahların Rusiyaya tədarükünün tamamilə dayandırılmasının vacibliyini qeyd edib və xarici komponentlər olmadan Rusiyanın raket proqramının heç bir hissəsini həyata keçirə bilməyəcəyini bildirib.

Ukrayna Müdafiə Kəşfiyyatının həmçinin Nijni Novqorod vilayətinin Kstovo şəhərində yerləşən və ildə 17 milyon ton neft emal edən Rusiyanın ən böyük neft emalı zavodlarından birində fəaliyyətin dayandığına dair sübutlara malik olduğu bildirilib. Zelenski digər neft emalı zavodlarında da fəaliyyətin dayandığını qeyd edərək, dəqiq əməliyyatlara görə Ukrayna hərbçilərinə təşəkkür edib.