Azərbaycan News Agency

Ukrayna Prezidenti Volodimir Zelenski ABŞ ilə aparılan danışıqlar prosesinin davam edəcəyini bildirərək Vaşinqton administrasiyasından Ukraynaya deyil, Rusiya Prezidenti Vladimir Putinə təzyiqi artırmasını gözlədiklərini ifadə edib.

Ukraynanın ABŞ ilə Ukraynada və ya Avropada görüşməyə hazır olduğunu bildirən Zelenski görüşün ABŞ-də keçirilməsi halında onlara dəvət göndərilməli olduğunu deyib. Üçtərəfli, ikitərəfli və ya daha geniş iştiraklı bütün danışıqlar formatlarına açıq olduqlarını vurğulayan Zelenski əsas prioritetlərinin sülh olduğunu qeyd edib. O, ABŞ tərəfinin görüşün gələn həftə keçirilə biləcəyinə dair siqnal verdiyini bildirib.

Zelenski Avropa ölkələrinin də Rusiya ilə danışıqlar üçün öz mexanizmlərini və ayrıca diplomatik prosesi formalaşdırmalı olduğunu bildirib. Müharibəni başa çatdırmaq üçün bütün mümkün yolların nəzərdən keçirilməsinin vacibliyini vurğulayan Zelenski Türkiyə ilə də ayrıca görüş keçiriləcəyini açıqlayıb. O, Prezident Rəcəb Tayyib Ərdoğanla dəniz və ərzaq təhlükəsizliyi məsələlərini müzakirə etməyi, həmçinin Yaxın Şərq ölkələrinin nümayəndələri ilə görüşməyi planlaşdırdığını bildirib.

Putinlə mümkün görüş barədə də danışan Zelenski ABŞ-nin üçtərəfli görüş təklifi üzərində işlədiyini deyib. O, görüşün Birləşmiş Ərəb Əmirliklərində və ya Səudiyyə Ərəbistanında, Avropa ölkələrindən birində, yaxud G20 Sammiti zamanı ABŞ-də keçirilə biləcəyini qeyd edib. Lakin Zelenski Rusiya və ABŞ tərəfindən hələlik qəti təsdiq verilmədiyini, Avropa ölkələrinin də bu məsələ ilə bağlı təmaslara başladığını bildirib.

Zelenskinin açıqlamaları jurnalistlərin suallarına verdiyi cavabların üçüncü hissəsində yer alıb.