Azərbaycan News Agency

Efiopiyanın Baş naziri Abiy Əhməd Əli paytaxt Əddis-Əbəbədə müasir, yaşıl və inklüziv şəhər yaratmaq məqsədilə həyata keçirilən Kechene–Ambassador–Gihon–Irreecha–Bambis Çay Sahili İnkişaf Layihəsinin açılışının keçirildiyini açıqlayıb.

Ümumilikdə 351 hektar ərazini və 10 kilometrlik marşrutu əhatə edən layihə çərçivəsində piyada yolları, velosiped zolaqları və inteqrasiya olunmuş nəqliyyat infrastrukturu yaradılıb. Layihəyə həmçinin uşaq oyun meydançaları, meydanlar, amfiteatrlar, idman obyektləri, səkkiz fəvvarə və su məkanları daxildir.

Avtomobil dayanacaqları ilə yanaşı, eyni vaxtda 100-dən çox elektrikli avtomobilin enerji ilə doldurulmasına imkan verən səkkiz elektrikli avtomobil şarj mərkəzi də layihənin infrastrukturuna daxil edilib.

Abiy Əhməd çayın idarə olunması, torpaq və suyun mühafizəsi tədbirləri və çay sahilindəki yaşıllıq sahələrinin ekoloji bərpanı şəhər yenilənməsi ilə birləşdirdiyini bildirib. O, layihə çərçivəsində iqtisadi imkanların da genişləndirildiyini qeyd edib. Əvvəllər çay boyunca yaşayan sakinlərin əl işlərini istehsal edə, nümayiş etdirə və sata biləcəyi bazar mərkəzi yaradılıb. Kənd təsərrüfatı istehsalçılarını bazarlarla əlaqələndirmək üçün kənd təsərrüfatı məhsulları mərkəzi də qurulub.

Abiy Əhməd layihənin məqsədini belə ifadə edib: “Vizyonumuz yalnız gözəl deyil, eyni zamanda məhsuldar və inklüziv şəhər qurmaqdır; bu gün xalqına və gələcək nəsillərə xidmət edən bir şəhər yaratmaqdır”.