Azərbaycan News Agency

Azərbaycanın paytaxtı Bakıda 15 yaşadək oğlan futbolçular arasında ilk dəfə təşkil olunan FIFA U-15 Dünya Kuboku və Festivalının rəsmi açılış mərasimi keçirilib. Oktyabrın 24-də Bakı Kristal Zalında təşkil edilən mərasimi Azərbaycan Prezidenti İlham Əliyev, həyat yoldaşı Mehriban Əliyeva, ailə üzvləri və FIFA Prezidenti Canni İnfantino izləyiblər.

Mərasimdən əvvəl İlham Əliyev və onu müşayiət edən şəxslər Canni İnfantino və digər dəvətlilərlə görüşüblər. FIFA Prezidenti Azərbaycan Prezidentinə xatirə hədiyyələri təqdim edib. Açılış proqramı Azərbaycan Respublikasının Dövlət Himninin səsləndirilməsi və turnirə həsr olunmuş videoçarxın nümayişi ilə başlayıb.

Tədbirdə çıxış edən Baş nazirin müavini və Təşkilat Komitəsinin sədri Samir Şərifov 189 milli komandanın iştirak etdiyi yarışa ev sahibliyi etməkdən məmnunluğunu ifadə edib. Şərifov FIFA ilə əməkdaşlığa toxunaraq turnirin keçirilməsi üçün Azərbaycana göstərilən etimada görə FIFA-ya təşəkkür edib. O, həmçinin tədbirin qısa müddətdə və yüksək standartlarla təşkilinə verdiyi dəstəyə görə Prezident İlham Əliyevə minnətdarlığını bildirib.

FIFA Prezidenti Canni İnfantino isə ilk dəfə keçirilən U-15 Dünya Kuboku və Festivalının futbol vasitəsilə dünyanı bir araya gətirdiyini bildirib. Bakıda 3 mindən çox futbolçu və rəsmi nümayəndənin olduğunu qeyd edən İnfantino yarışda iştirak edən 189 komanda ilə yanaşı, könüllülərin və əməkdaşların da turnirə töhfə verəcəyini vurğulayıb.

İnfantino futbolçuları turnirdən zövq almağa, ədalətli mübarizə aparmağa, rəqiblərinə hörmət göstərməyə və oyun qaydalarına əməl etməyə çağırıb. FIFA Prezidenti tədbirin təşkilinə verdikləri töhfəyə görə Prezident İlham Əliyevə və Təşkilat Komitəsinə təşəkkür edib.

Açılış mərasimindən sonra müxtəlif ölkələrdən komandaların iştirakını əks etdirən videoçarx nümayiş olunub və proqram bədii çıxışlarla davam edib.

Prezident İlham Əliyev, həyat yoldaşı Mehriban Əliyeva, ailə üzvləri və FIFA Prezidenti Canni İnfantino açılış proqramından sonra Azərbaycan və Timor-Leste milli komandaları arasında keçirilən qarşılaşmanı izləyiblər. Oyun Azərbaycanın 6:0 hesablı qələbəsi ilə başa çatıb.

Qarşılaşmadan sonra İlham Əliyev və onu müşayiət edən şəxslər Azərbaycan komandasının futbolçuları ilə görüşüblər. Futbolçuları təbrik edən Əliyev komandanın nümayiş etdirdiyi oyunu və vurduğu qolları yüksək qiymətləndirib.

Turnirin Azərbaycan üçün tarixi hadisə olduğunu bildirən Əliyev ilk dəfə bu miqyasda keçirilən yarışın tarixə düşəcəyini ifadə edib. Açılış oyunundakı qələbənin də yadda qalan uğur kimi xatırlanacağını qeyd edən Əliyev futbolçulara yeni nailiyyətlər arzulayıb.