Azərbaycan News Agency

ABŞ administrasiyası İranın neft ticarəti ilə əlaqəli olduğu bildirilən 15 quruma, iki şəxsə və “kölgə donanması” adlandırılan 14 gəmiyə qarşı yeni sanksiyalar tətbiq etdiyini açıqlayıb.

ABŞ Dövlət Departamentinin açıqlamasında Donald Tramp administrasiyasının “maksimum təzyiq” kampaniyası çərçivəsində İran rejiminin qeyri-qanuni neft və neft-kimya ixracını azaltmaqda qətiyyətli olduğu vurğulanıb.

Sanksiya qərarı ABŞ ilə İran arasında Omanın paytaxtı Maskatda aparılan dolayı danışıqların cümə günü başa çatmasından sonra elan edilib.

İranın rəsmi xəbər agentliyi IRNA-nın məlumatına görə, İranın xarici işlər naziri Seyid Abbas Araqçi danışıqlarda yalnız nüvə məsələsinin müzakirə olunduğunu, Vaşinqtonla başqa heç bir mövzunun gündəmə gətirilmədiyini bildirib.

Araqçi iki ölkə arasında keçmiş təmaslardan qaynaqlanan “çox dərin etimadsızlığın” danışıqlar üçün “çox böyük çətinlik” yaratdığını vurğulayıb.

Danışıqlardan əvvəl isə Ağ Evin sözçüsü Karolin Livitt ABŞ prezidentinin diplomatiyadan başqa da bir çox seçimə sahib olduğunu deyib.