Azərbaycan News Agency

Azərbaycan Prezidenti İlham Əliyev Qırğızıstana dövlət səfəri çərçivəsində Çolpon-Ata şəhərində rəsmi mərasimlə qarşılandı.

Azərbaycan və Qırğızıstan bayraqlarının dalğalandığı mərasimdə Prezident Əliyevin şərəfinə hərbi fəxri qarovul düzülmüşdü.

Qırğızıstan Prezidenti Sadır Japarov Azərbaycan Prezidenti İlham Əliyevi rəsmi mərasimlə qarşıladı.

Fəxri qarovulun komandiri Prezident Əliyevə mərasim salamı verdi. Daha sonra Azərbaycan və Qırğızıstanın dövlət himnləri səsləndirildi.

Əliyev qırğız əsgərlərini salamladıqdan sonra iki ölkə lideri fəxri qarovulun önündən keçdi.

Mərasim zamanı Qırğızıstanın dövlət və hökumət nümayəndələri Prezident Əliyevə, Azərbaycan nümayəndə heyətinin üzvləri isə Prezident Japarova təqdim olundu.

Hərbi marşın müşayiəti ilə fəxri qarovul iki liderin önündən keçdi, mərasimdən sonra isə Əliyev və Japarov rəsmi foto çəkdirdilər.

Səfər çərçivəsində Əliyevlə Japarov arasında təkbətək görüş keçirildi.

Azərbaycan Prezidentinin Mətbuat Xidmətinin məlumatına görə, iyulun 31-də keçirilən görüşdə iki ölkə arasındakı münasibətlər və əməkdaşlıq imkanları müzakirə olunub.