Azərbaycan News Agency

Amerika Birləşmiş Ştatlarının (ABŞ) Ankaradakı səfiri Tom Barrack ABŞ Maliyyə Nazirliyinin İran İslam İnqilabı Keşikçiləri Korpusunun Qüds Qüvvələri adından vəsait köçürülməsindəki rollarına görə Türkiyə mərkəzli maliyyə qurumu və onun iki törəmə şirkəti ilə bağlı qəbul etdiyi qərara münasibət bildirib.

Barrack bildirib ki, sözügedən tədbir hər hansı bir dövlətə, bank sisteminə və ya müttəfiqə qarşı deyil, yalnız bir qurumun davranışına yönəlib.

Qərarı “dəqiq və qanuni icra tədbiri” adlandıran Barrack ABŞ-nin İrana qarşı maksimum təzyiq siyasətinin Tehranın fəaliyyətlərindən əldə olunan gəlirlərin ötürüldüyü kanalların bağlanmasına əsaslandığını deyib.

Türkiyənin maliyyə sisteminin şübhə altına alınmadığını vurğulayan Barrack, “Türkiyə maliyyə sisteminin sağlamlığı şübhə altına alınmır; yalnız bir qurumun davranışı şübhə altına alınıb” ifadələrini işlədib.

Barrack bildirib ki, Türkiyə rəsmiləri proses boyunca ABŞ-li həmkarları ilə birbaşa təmasda olub və qeyri-müəyyənliklərin aradan qaldırılması, eləcə də şəffaflığın gücləndirilməsi üçün iş aparıblar.

ABŞ ilə Türkiyə arasındakı münasibətlərin bir qurumdan və ya bir gündən çox-çox böyük olduğunu qeyd edən Barrack iki ölkənin regional sabitlik, ticarət və təhlükəsizliyin təmin olunması məsələlərində “eyni tərəfdə” olduğunu bildirib.

Barrack bu prosesin zamanla iki ölkə arasındakı tərəfdaşlığın gücünü göstərən nümunə kimi qiymətləndiriləcəyini bildirərək, “hər iki xalqımızı və onların arasındakı ittifaqı əvvəlkindən daha güclü edən ortaq şəffaflıq öhdəliyi”ni vurğulayıb.