Azərbaycan News Agency

Bəhreyn Kralı Həməd bin İsa Əl Xəlifə Manamada BƏƏ-nin Dubay vəliəhdi, Baş nazirin müavini və müdafiə naziri Şeyx Həmdan bin Məhəmməd bin Rəşid Əl Məktumu qəbul edib.

BƏƏ Müdafiə Nazirliyinin açıqlamasına görə, görüşdə Bəhreynin Milli Təhlükəsizlik üzrə müşaviri və Kral Mühafizəsinin komandanı briqada generalı şahzadə Şeyx Naser bin Həməd Əl Xəlifə, həmçinin Kral Mühafizəsinin Xüsusi Əməliyyatlar komandanı briqada generalı şahzadə Şeyx Xalid bin Həməd Əl Xəlifə də iştirak edib.

Bildirilib ki, səfər Bəhreyn Müdafiə Qüvvələrinin ev sahibliyi etdiyi “Bahrain Shield” birgə hərbi təlimi ilə eyni dövrə təsadüf edib.

Təlimdə BƏƏ Silahlı Qüvvələrinin Məhəmməd bin Zayed eskadrilyası, Körfəz Əməkdaşlıq Şurasına (KƏŞ) üzv ölkələrin müxtəlif hərbi bölmələri və Ada Qalxanı Qüvvələrinin elementləri iştirak edib.

Açıqlamada qeyd olunub ki, təlim Körfəz ölkələri arasında birgə hərbi əməkdaşlığın inkişaf etdirilməsi, silahlı qüvvələr arasında koordinasiya və inteqrasiyanın gücləndirilməsi məqsədilə təşkil olunub.

Həmçinin əməliyyat ssenarilərinin icrası, səhra təlimlərinin keçirilməsi, təcrübə mübadiləsi, komanda və idarəetmə sistemlərinin inkişaf etdirilməsi, eləcə də müxtəlif təhlükəsizlik və müdafiə təhdidlərinə qarşı hazırlıq səviyyəsinin artırılmasının hədəfləndiyi bildirilib.

Bəhreyn Kralı Həməd bin İsa Əl Xəlifə ilə Şeyx Həmdan bin Məhəmməd bin Rəşid Əl Məktumun təlimin mərhələlərini və iştirakçı bölmələrin keçirdiyi hazırlıq fəaliyyətlərini nəzərdən keçirdiyi qeyd olunub.

Şeyx Həmdan bin Məhəmməd bin Rəşid Əl Məktumu səfəri zamanı BƏƏ-nin Süni İntellekt üzrə Dövlət Naziri Ömər bin Sultan Əl Olama, Silahlı Qüvvələrin Baş Qərargah rəisi генерал-leytenant İsa Seyf bin Ablan Əl Məzrui və Müdafiə Nazirliyinin yüksək vəzifəli rəsmiləri müşayiət ediblər.