Azərbaycan News Agency

Litvanın xarici işlər naziri Kestutis Budris Beynəlxalq Müasir Beşnövçülük İttifaqının (UIPM) Litvanın Dünya Kuboku yarışına ev sahibliyi etmək hüququnu əlindən almaq qərarına etiraz edib.

Budris sosial media hesabında paylaşdığı açıqlamada bu qərarın Rusiyanın Ukraynaya qarşı müharibəsini görməzdən gəlməkdən imtina edən Litvanı cəzalandırdığını bildirib. Qərarı “utancverici” adlandıran Budris bunun təhlükəli presedent yaratdığını və yanlış mesaj verdiyini ifadə edib.

Budris Litvanın əvvəldən təcavüzkar dövlətlər hesab etdiyi Rusiya və Belarus nümayəndələrinin beynəlxalq idmanda iştirakının normallaşdırılmasına qarşı çıxdığını bildirib. O, Rusiyanın Ukraynaya qarşı müharibəni davam etdirdiyini, Belarusun isə bu prosesdə Rusiyaya dəstək verdiyini iddia edib.

Budris Avropa İttifaqını Rusiya və Belarus idmançılarının öz milli bayraqları altında yarışmasına dair məhdudiyyətləri sərtləşdirməyə, viza qadağalarını və sanksiyaları genişləndirməyə çağırıb. O, həmçinin dövlət tərəfindən dəstəklənən təbliğata imkan yaradan təşkilatlara verilən dəstəyin dayandırılmasını istəyib.

Litvanın təcavüzü heç vaxt normallaşdırmayacağını vurğulayan Budris ölkəsinin yalnız əlverişli şəraitdə deyil, çətin dövrlərdə də Ukraynanın yanında olacağını qeyd edib.