Azərbaycan News Agency

Pakistanın Baş nazirinin müavini və xarici işlər naziri Məhəmməd İshaq Dar Azad Kəşmir (AJK) və Gilgit-Baltistan (GB) bölgələrinə aid məsələləri qiymətləndirmək üçün hökumət rəsmiləri ilə iclas keçirib.

Pakistan Xarici İşlər Nazirliyinin açıqlamasına görə, iclasda hər iki bölgədəki inzibati və idarəetmə problemləri müzakirə edilib. Federal və regional qurumlar arasında koordinasiyanın gücləndirilməsi, həllini gözləyən qanunvericilik və maliyyə məsələlərinin həlli, sosial-iqtisadi inkişaf layihələrinin sürətləndirilməsi də nəzərdən keçirilib.

İclasın gündəliyinə yol, infrastruktur, səhiyyə xidmətləri və regional nəqliyyat əlaqələri layihələri də daxil edilib. Dar Azad Kəşmir və Gilgit-Baltistanın tarixi əhəmiyyətinə və bu bölgələrin əhalisinin fədakarlıqlarına diqqət çəkərək yeni formalaşmış regional administrasiyaların idarəetmə problemlərinin həlli üçün nəticəyönümlü addımlar atmalı olduğunu bildirib.

Dar davam edən inkişaf layihələrinin sürətləndirilməsi və əhaliyə konkret iqtisadi və sosial faydaların təmin edilməsi məqsədilə müvafiq regional administrasiyalarla sıx koordinasiyanın qurulması barədə göstəriş verib.

İclasda Kəşmir İşləri, Gilgit-Baltistan, Ştatlar və Sərhəd Bölgələri (SAFRON) üzrə nazir, Baş nazirin xüsusi köməkçisi (SAPM) Tariq Bacva, Kəşmir İşləri, Gilgit-Baltistan və SAFRON üzrə katiblər, eləcə də aidiyyəti nazirliklərin yüksəkvəzifəli rəsmiləri iştirak ediblər.