Azərbaycan News Agency

Omanın xarici işlər naziri Bədr Əl-Busaidi açıqlamasında Sultan Heysəm bin Tariqin Çinə rəsmi səfərinin iki ölkə arasındakı münasibətlərdə əməkdaşlığın yeni mərhələsinə yol açdığını bildirib. O, keçirilən görüşlərin və imzalanan sazişlərin qarşılıqlı fayda əsasında iqtisadiyyat, elm, sənaye, texnologiya və investisiya sahələrində tərəfdaşlığı inkişaf etdirmək iradəsini əks etdirdiyini vurğulayıb.

Əl-Busaidi çinli turistlər və iş adamları üçün imkanların daha da genişləndirilməsinin də gündəmdə olduğunu qeyd edib. O, regional və beynəlxalq məsələlərlə bağlı məsləhətləşmələr zamanı mühüm mövzularda mövqelərin yaxınlığının müşahidə edildiyini bildirib. Beynəlxalq hüquqa, çoxtərəfliliyə və suverenliyə hörmətin vurğulandığını qeyd edən Əl-Busaidi Çin Prezidenti Si Cinpinə və Çin hökumətinə göstərdikləri qonaqpərvərliyə görə təşəkkür edib.