Azərbaycan News Agency

Fələstin Xarici İşlər və Diaspora Nazirliyi İsrail hakimiyyətinin işğal altındakı İordan çayının qərb sahilindən Şərqi Qüdsdəki Fələstin məktəblərində çalışan müəllim və əməkdaşların məktəblərinə girişini əngəlləməsini pisləyib.

Nazirliyin açıqlamasında bildirilib ki, bu tətbiq yeni tədris ilinin başlaması ilə dərslərin pozulmasına və dayandırılmasına səbəb olub və bunun fələstinli şagirdlərin təhsil hüququnun birbaşa pozulması olduğu iddia edilib. Açıqlamada sözügedən tətbiqin Şərqi Qüdsdəki Fələstin təhsil müəssisələrini hədəf alan hücum xarakteri daşıdığı bildirilib.

Nazirlik İsrailin təhsil proqramları ilə bağlı tətbiqlərinə də etiraz edib. Açıqlamada İsrailin yalnız əraziləri işğal etmək və nəzarətdə saxlamaqla kifayətlənmədiyi, eyni zamanda İsrail təhsil proqramlarını tətbiq etməyə çalışdığı iddia olunub.

Açıqlamada təhsil, tədris proqramları və informasiya mənbələrinə nəzarət yolu ilə tarixi narrativin də dəyişdirilməsinə çalışıldığı, bunun fələstinli nəsillərə fərqli bir narrativ tətbiq etmək və onların öz tarixini, sivilizasiyasını və milli kimliyini tanımaq hüququnu əlindən almaq məqsədi daşıdığı iddia edilib.

Fələstin Xarici İşlər Nazirliyi Birləşmiş Millətlər Təşkilatının Fələstinli Qaçqınlara Yardım və İşlər Agentliyinin (UNRWA) işğal altındakı Şərqi Qüdsdəki qurumlarının hədəf alınmasının davam etməsini və obyektlərinin müsadirə edilməsini də pisləyib.

Nazirlik Şərqi Qüdsün işğal altındakı Fələstin ərazisi olduğunu vurğulayaraq, İsrailin şəhərin xarakterini və kimliyini dəyişdirməyə, hüquqi, demoqrafik, mədəni və dini quruluşunu transformasiya etməyə və ya işğal altındakı İordan çayının qərb sahilinin ilhaqını möhkəmləndirməyə yönəlmiş bütün tətbiqlərinin etibarsız və qeyri-qanuni olduğunu bildirib.

Açıqlamada bu tətbiqlərin İsrailə Şərqi Qüds üzərində heç bir hüquq və ya suverenlik qazandırmayacağı qeyd olunub, Qüdsün dini, mədəni və sivilizasiya kimliyinin qorunmasının beynəlxalq hüquqa əsaslanan beynəlxalq məsuliyyət olduğu bildirilib.

Fələstin Xarici İşlər və Diaspora Nazirliyi beynəlxalq ictimaiyyəti, Birləşmiş Millətlər Təşkilatını və dövlətləri hüquqi və siyasi məsuliyyətlərini yerinə yetirməyə çağırıb.

Nazirlik beynəlxalq ictimaiyyətin yalnız qınama bəyanatları ilə kifayətlənməməli olduğunu bildirərək, İsrailin Fələstin təhsil müəssisələrini hədəf almağı dayandırması, müəllim və əməkdaşların məktəblərinə girişini təmin etməsi və fələstinli şagirdlərin təhsil hüququna hörmət göstərməsi üçün konkret addımlar atılmasını istəyib.

Açıqlamada həmçinin Qüds qurumlarının qorunması, şəhərin tarixi, mədəni və dini kimliyinin mühafizə edilməsi və Fələstin dövlətinin ərazilərində İsrail işğalına son qoyulması üçün konkret və praktiki tədbirlərin görülməsinə çağırış edilib.

Nazirlik Fələstin dövlətinin paytaxtının Qüds olduğunu bir daha bəyan edərək, şəhərin statusunu və kimliyini dəyişdirməyə yönəlmiş tətbiqlərin beynəlxalq hüquq baxımından qəbuledilməz olduğunu bildirib.