Azərbaycan News Agency

Xilasetmə qrupları Sebu şəhərindəki Binaliv Zibil Poliqonunun dağıntıları altından 12 yaralı təmizlik işçisini xilas edərək xəstəxanaya yerləşdiriblər.

Qurbanların əksəriyyətinin poliqonda çalışan işçilər olduğu ehtimal edilir. Çökmənin səbəbi hələlik məlum deyil.

Müxtəlif dövlət qurumlarından və vətəndaş qruplarından təxminən 300 nəfər özəl mülkiyyətə aid zibil poliqonuna göndərilib. Hadisə yerində çoxsaylı ekskavatorlar, təcili tibbi yardım və yanğınsöndürmə maşınları da müşahidə olunub.

Sebu şəhərinin meri Nestor Arçival cümə günü Facebook paylaşımında bildirib: “Bütün müdaxilə qrupları itkin düşən şəxslərin tapılması üçün axtarış-xilasetmə işlərini tam şəkildə davam etdirir.”

Sebu Şəhər Şurasının üzvü Joel Qarganera hadisənin qəfil baş vermiş ola biləcəyini, lakin ehtimal ki, zəif tullantı idarəetmə təcrübələrinin nəticəsi olduğunu deyib.

Qarganera yerli The Freeman qəzetinə verdiyi müsahibədə operatorların dağı oyduğunu, torpağı qazdığını və sonra tullantıları yığaraq yeni bir zibil dağı yaratdıqlarını bildirib.

“Bu, sanitar zibil poliqonu deyil. Artıq açıq zibilxanadır,” – deyə o vurğulayıb.

Zibil poliqonları Filippinin ticarət mərkəzi və nəqliyyat qapısı olan Visayas bölgəsinin (arxipelaq ölkəsinin mərkəzi adaları) əsas şəhərlərində geniş yayılıb.