Azərbaycan News Agency

Avropa Komissiyasının sədri fon der Leyen, ABŞ (Amerika Birləşmiş Ştatları) və Çin arasında sıxışan Avropa iqtisadiyyatının gücləndirilməsinə yönəlmiş mühüm sammit ərəfəsində bildirib ki, yekdillik əldə olunmadığı təqdirdə iqtisadi məsələlər üzərində işləməyə hazır olan ölkələr daha kiçik qruplar şəklində irəliləməlidir.

O qeyd edib ki, məqsəd 27 üzv dövlətin hamısı tərəfindən qəbul edilmiş “iddialı” iqtisadi gündəliyin həyata keçirilməsidir, lakin siyasi fərqliliklər səbəbindən bunun mümkün olmadığı hallarda üzv dövlətlər daha kiçik koalisiyalara yönəlməlidir.

AB-nin gücləndirilmiş əməkdaşlıq prinsipi ən azı doqquz ölkənin razılığı ilə üzv dövlətlərə digər üzvlərdən asılı olmayaraq inteqrasiyanı dərinləşdirməyə imkan verir.

Fon der Leyenin açıqlamaları AB institutlarını istiqamətləndirən konsensus prinsipindən əhəmiyyətli bir uzaqlaşmanı göstərir və iki sürətli Avropaya yol açır.

Görüş ərəfəsində Avropa Şurasının sədri Antonio Kosta Euronews-ə bildirib ki, bu toplantı 2024-cü ildə dərc edilmiş Draqi və Letta hesabatlarının icrasına fokuslanacaq və liderlər üçün “aydın siyasi göstərişlər” təqdim edəcək.

Sammitdən əvvəl Almaniya, İtaliya və Belçikanın dəvəti ilə on ölkə ümumi mövqe formalaşdırmaq üçün bir araya gələcək. Bir diplomatın sözlərinə görə, Fransa da bu qrupa qoşulacaq.

Fon der Leyen bazar ertəsi liderlərə ünvanladığı məktubda yazıb: “Məqsədimiz hər zaman 27 üzv dövlətin hamısı arasında razılıq əldə etmək olmalıdır”.

O əlavə edib: “Lakin irəliləyişin və ya məqsədlərin olmaması Avropanın rəqabət qabiliyyətini və ya fəaliyyət imkanlarını zəiflətmək riski daşıdığı hallarda, müqavilələrdə nəzərdə tutulan ‘gücləndirilmiş əməkdaşlıq’ prinsipi çərçivəsindəki imkanlardan istifadə etməkdən çəkinməməliyik”.

Avropa Mərkəzi Bankının keçmiş prezidenti Mario Draqi, keçmiş İtaliya baş naziri Enriko Letta ilə birlikdə 27 üzvü təmsil edərək iştirak edəcək.