Azərbaycan News Agency

CCTV-nin məlumatına görə, Rusiya Müdafiə Nazirliyi bazar ertəsi günü yaydığı açıqlamada son 24 saat ərzində Ukraynaya məxsus hərbi hava limanı infrastrukturu, enerji və nəqliyyat obyektləri, həmçinin Ukrayna ordusu və xarici muzdluların müvəqqəti yerləşmə məntəqələrinin vurulduğunu qeyd edib.

Həmçinin bildirilib ki, Rusiya hava hücumundan müdafiə bölmələri Ukrayna qüvvələri tərəfindən buraxılan 3 idarə olunan bomba və 72 sabit qanadlı pilotsuz uçuş aparatını (PUA) məhv edib.

Ukrayna Silahlı Qüvvələrinin Baş Qərargahı bazar ertəsi günorta saatlarına qədər cəbhə xətlərində 74 toqquşmanın baş verdiyini, döyüşlərin əsasən Pokrovsk istiqamətində cəmləşdiyini açıqlayıb. Ukrayna Hərbi Hava Qüvvələri isə bazar axşamından bazar ertəsi səhərinə qədər ümumilikdə 116 Rusiya PUA-sının vurulduğunu və ya zərərsizləşdirildiyini bildirib.

Rusiya Xarici İşlər Naziri Sergey Lavrov vurğulayıb ki, Rusiya Ukrayna ərazisində ölkənin təhlükəsizlik maraqlarını təhdid edə biləcək hər hansı silahın yerləşdirilməsinə icazə verməyəcək.

Diplomatik təmaslara da toxunan Lavrov, ABŞ-nin Ukrayna məsələsindəki mövqeyinin mühüm olduğunu bildirib. O, Rusiyanın ABŞ-dən gələn danışıqlar təklifini qəbul etdiyini, lakin Vaşinqtonun Rusiya tərəfinin irəli sürdüyü təklifləri qəbul etməyə hazır olmadığını deyib.