Azərbaycan News Agency

Hegseth ABŞ-ın bölgədəki hərbi mövcudluğuna diqqət çəkərək, “ABŞ donanması Hörmüz boğazındakı hərəkəti nəzarətdə saxlayır” dedi. O, ABŞ donanmasının bölgədə aktiv olduğunu vurğuladı və İranın dəniz gücünün zəiflədiyini iddia etdi.

Hegseth İranın ticarət gəmilərinə yönəlmiş təhdidlərini “nəzarət” deyil, “korsanlıq” kimi qiymətləndirdi. İran İnqilab Keşikçiləri Korpusunun dənizdəki fəaliyyətlərini tənqid edən Hegseth bu fəaliyyətlərin beynəlxalq ticarəti təhdid etdiyini bildirdi.

Hegseth həmçinin ABŞ-ın İrana qarşı tətbiq etdiyi dəniz və iqtisadi təzyiqlərə toxunaraq, Hörmüz boğazındakı blokadanın “lazım gələrsə qeyri-müəyyən müddətə davam edəcəyini” qeyd etdi. O, bu blokadanın İranın enerji ixracını ciddi şəkildə məhdudlaşdırdığını vurğuladı.

Hegseth əlavə etdi ki, İran uzun müddətdir ABŞ-a qarşı düşmən siyasət yürüdür: “Əsl bitməyən müharibə İranın 47 ildir bizə qarşı apardığı müharibədir.”

O, həmçinin İranla hər hansı bir razılaşmaya nail olmaq üçün tələsmədiklərini bildirdi.