Azərbaycan News Agency

İsrail Müdafiə Qüvvələri (IDF) İranın hava hücumundan müdafiə sistemlərinə qarşı yeni hücum həyata keçirildiyini və bəzi sistemlərin məhv edildiyini açıqlayıb.

Ordunun açıqlamasında bildirilib ki, İsrail Hərbi Hava Qüvvələri İranın qərb və mərkəzi bölgələrində yerləşən hava hücumundan müdafiə obyektlərinə qarşı əməliyyatlar keçirib.

Açıqlamada həmçinin hücum anına aid görüntülərin yayımlandığı və hədəf alınan sistemlərdən birinin tamamilə məhv edildiyi qeyd olunub.

Bu sistemlərdə təyyarələrə qarşı istifadə olunan raket elementlərinin olduğu və hücumdan sonra ikinci dərəcəli partlayışların müşahidə edildiyi bildirilib.

IDF qeyd edib: «Bu sistemlərin məhv edilməsi Hərbi Hava Qüvvələrinin İran səmasında hava üstünlüyünü daha da genişləndirməyə və İsrail Dövlətinin vətəndaşlarına yönəlmiş təhdidlərin aradan qaldırılmasını davam etdirməyə xidmət edir.»