Azərbaycan News Agency

İsrailin xarici işlər naziri Gideon Saar Qüdsdə Konqo Demokratik Respublikasının xarici işlər naziri Terese Kayikvamba Vaqneri qəbul edib.

Görüşdə ikitərəfli münasibətlərin inkişafı, regional proseslər və səhiyyə sahəsində əməkdaşlıq müzakirə olunub.

Saar sosial media hesabında paylaşdığı açıqlamada bildirib ki, BMT Təhlükəsizlik Şurasının üzvü olan Konqo Demokratik Respublikası beynəlxalq aləmdə mühüm söz sahibidir və İsrail bu ölkənin dəstəyini yüksək qiymətləndirir.

Saar görüş çərçivəsində diplomatik hazırlıq və siyasi məsləhətləşmələr sahəsində iki anlaşma memorandumunun imzalandığını, həmçinin İsrailin beynəlxalq inkişaf agentliyi MASHAV vasitəsilə həyata keçirilən əməkdaşlıqlar da daxil olmaqla ikitərəfli münasibətlərin müzakirə edildiyini bildirib.

O, həmçinin İsrailin Ebola ilə mübarizə çərçivəsində Konqo Demokratik Respublikasına dəstəyini davam etdirdiyini qeyd edərək, "3 ton tibbi yardımın Konqo Demokratik Respublikasına çatdırıldığını və istifadəyə hazır olduğunu" bildirib.

Saar əlavə edib ki, görüşdə İsrailin regional təhlükəsizlik problemləri ilə yanaşı, Ruanda ilə Konqo Demokratik Respublikası arasında imzalanmış sülh sazişi də müzakirə olunub və sənədin bütün tərəflər tərəfindən tam şəkildə icra edilməsinin regional sülh və sabitlik baxımından mühüm əhəmiyyət daşıdığını vurğulayıb.