Azərbaycan News Agency

İsrailin Baş naziri Benyamin Netanyahu Amerika Birləşmiş Ştatlarının Prezidenti Donald Trampla keçirəcəyi görüş öncəsi açıqlama verib.

Netanyahu bildirib ki, bu, Trampın ikinci prezidentlik müddətinə seçilməsindən sonra onunla səkkizinci görüşü olacaq və bu göstərici Trampın digər beynəlxalq liderlərlə keçirdiyi görüşlərin sayından çoxdur.

O qeyd edib ki, bu vəziyyət onun üçün həm böyük şərəf, həm də mühüm məsuliyyət daşıyır.

Netanyahu görüşdə bir çox məsələnin müzakirə olunacağını bildirərək deyib: "Gündəmdəki bütün mövzuları müzakirə edəcəyik. Onların başında İran gəlir. Məqsədimiz aydındır: İsrailin təhlükəsizliyini qorumaq, gücünü möhkəmləndirmək və ətrafımızdakı sülh dairəsini genişləndirmək."

Netanyahu vurğulayıb ki, Vaşinqtona İsrailin təhlükəsizliyini və gələcəyini təmin etmək məqsədilə gedib. O, səfəri çərçivəsində ABŞ senatoru Lindsi Qrema da ehtiramını ifadə edəcəyini bildirib.

Qremi "İsrail dövlətinin əsl dostu və İsrailin indiyədək malik olduğu ən böyük dostlardan biri" adlandıran Netanyahu bildirib ki, bu hisslərin bütün İsrail vətəndaşlarını təmsil etdiyinə inanır.

Netanyahu çıxışını belə yekunlaşdırıb: "Allahın köməyi ilə bunu edəcəyik və uğur qazanacağıq."