Azərbaycan News Agency

İspaniyanın Baş naziri Pedro Sançes ölkədə baş verən meşə yanğınları və iqlimlə bağlı fəlakətlərlə əlaqədar genişmiqyaslı "Dövlət Paktı"nın qəbul edilməsinə çağıraraq bildirib ki, əsas prioritet insan həyatının qorunması, yaşayış məntəqələrinin təhlükəsizliyinin təmin olunması və yanğınlarla mübarizədir.

"Prioritetimiz insanların həyatını qorumaq, yaşayış məntəqələrini müdafiə etmək və alovla mübarizə aparmaqdır", - deyən Sançes əlavə edib ki, yanğınlara müdaxilə və bərpa işləri ilə yanaşı, profilaktik tədbirlər də gücləndirilməlidir.

İqlim dəyişikliyinin təsirlərinin getdikcə daha ağır hiss olunduğunu vurğulayan Sançes bildirib: "İqlim Fövqəladə Vəziyyəti qarşısında Dövlət Paktı üzrə razılığın əldə olunması üçün yenidən çağırış edirəm ki, iqlim dəyişikliyinin getdikcə daha ekstremal xarakter alan təsirlərinə cavab verə bilək."