Azərbaycan News Agency

İsrail Müdafiə Qüvvələri (IDF) sosial media hesabında yaydığı açıqlamada İordan çayının qərb sahilində yerləşən Əl-Xəlil şəhərində terrorizmlə mübarizə əməliyyatı zamanı həftəsonu baş verən toqquşmada iştirak edən hücumçulardan birinin evinin yaxınlığında yeraltı boşluq aşkar edildiyini elan edib.

Açıqlamada boşluğun 500-dən çox nöqtədə aparılan genişmiqyaslı axtarışlar zamanı aşkar edildiyi bildirilib. İlkin araşdırmalara əsasən, boşluğun təxminən 15 metr dərinliyində və 75 santimetr enində olduğu, çıxış dəliyinin isə olmadığı ehtimal edilir. İsrail ordusu boşluğun Əl-Xəlil şəhərinin daxilində yerləşdiyini və heç bir İsrail yaşayış məntəqəsinə yaxın olmadığını qeyd edib.

Boşluqda tapılan elektron cihazın araşdırılması üçün təhlükəsizlik qüvvələrinə təhvil verildiyi və məsələ ilə bağlı istintaqın davam etdiyi bildirilib.

Əməliyyatın həftəsonu Əl-Xəlildə baş verən toqquşmada baş çavuş Ron Yonatan Roytman və çavuş Yuval Şay Svilamın həyatını itirməsi, daha üç hərbçinin isə yüngül yaralanmasından sonra başladıldığı qeyd olunub. İsrail ordusu bölgədə genişmiqyaslı axtarışların, şübhəlilərin saxlanılmasının, silahların və qanunsuz vasitələrin müsadirəsinin davam etdiyini açıqlayıb.