Azərbaycan News Agency

Xorvatiyanın Baş naziri Andrey Plenkoviç yeni Milli Uşaq Xəstəxanasının təməlqoyma mərasimi ilə tikinti prosesinin başladığını bildirib. Layihənin maliyyələşdirilməsinin 90 faizinin Avropa İttifaqının Regional İnkişaf Fondu hesabına qarşılanacağını qeyd edən Plenkoviç xəstəxananın 38 ay ərzində tamamlanmasının planlaşdırıldığını ifadə edib.

Təxminən 300 min uşağa tibbi xidmət göstərməsi nəzərdə tutulan xəstəxanada 200-ə yaxın çarpayı və gündəlik təxminən 100 xəstəni müalicə etmək imkanı olacaq. Plenkoviç müəssisənin müasir tibbi avadanlıqlarla təchiz ediləcəyini və enerji tələbatının 80 faizinin günəş və geotermal enerji kimi bərpa olunan mənbələrdən təmin ediləcəyini bildirib.

Plenkoviç həmçinin Xorvatiya üzrə səhiyyə infrastrukturuna indiyədək 3,4 milyard avrodan çox sərmayə yatırıldığını qeyd edib.