Azərbaycan News Agency

İsrail Müdafiə Qüvvələri (IDF) Livanın cənubunda keçirilən əməliyyatlar çərçivəsində Hizbullaha məxsus olduğu bildirilən yeraltı infrastrukturun, silah anbarlarının və müxtəlif döyüş vasitələrinin məhv edildiyini açıqlayıb.

IDF-nin sosial media hesabında yayılan açıqlamada 91-ci Diviziyanın bölmələrinin Livanın cənubundakı təhlükəsizlik zonasında İsrail vətəndaşlarına qarşı təhdidlərin aradan qaldırılması istiqamətində fəaliyyətlərini davam etdirdiyi bildirilib.

Açıqlamaya görə, Sarbine bölgəsində keçirilən hədəfli əməliyyat zamanı 300-cü Briqadanın bölmələri və Yahalom birliyi onlarla metr uzunluğunda yeraltı keçidi məhv edib. İsrail ordusu Hizbullahın bu tuneldən hərbçilərə qarşı hücumların hazırlanması və həyata keçirilməsi məqsədilə istifadə etdiyini iddia edib.

IDF həmçinin bildirib ki, Kfir Briqadasının bölmələri son günlər Livanın cənubunda əməliyyatlar keçirib və Hizbullaha məxsus olduğu deyilən raketatanlar və raketlərin saxlanıldığı döyüş sursatı anbarı aşkarlanaraq zərərsizləşdirilib.

Açıqlamada əlavə olaraq qeyd olunub ki, 4-cü Briqadanın bölmələri bölgədə çoxlu sayda silah və sursat ələ keçirib. Onların arasında Kalaşnikov tipli avtomatlar, tank əleyhinə raketlər və müxtəlif döyüş avadanlıqları olub.