Azərbaycan News Agency

Dar 5 avqust "Youm-e-Istehsal" münasibətilə yaydığı müraciətdə Hindistanın 5 avqust 2019-cu ildə Cammu və Kəşmirin statusu ilə bağlı atdığı birtərəfli addımların beynəlxalq hüquqa zidd olduğunu iddia edib.

Dar bildirib ki, Pakistan bu günü "Hindistanın idarə etdiyi Cammu və Kəşmir xalqı ilə həmrəylik məqsədilə" qeyd edir və Kəşmir xalqının öz müqəddəratını təyin etmək hüququna dəstəyini bir daha təsdiqləyib.

Bəyanatda qeyd olunub ki, "5 avqust 2019-cu ildə atılan addımlar və sonrakı siyasətlər Cənubi Asiyada sülh və sabitlik səylərini daha da çətinləşdirib, Kəşmir xalqının həyatına, hüquq və azadlıqlarına mənfi təsir göstərib."

Dar beynəlxalq ictimaiyyəti beynəlxalq hüquqa, beynəlxalq humanitar hüquqa və insan hüquqlarına hörmətin təmin edilməsi üçün daha fəal rol oynamağa çağırıb.

O bildirib ki, Pakistan Hindistandan Cammu və Kəşmirin beynəlxalq səviyyədə mübahisəli hesab edilən statusunu dəyişdirməyə yönəlmiş addımları dayandırmasını tələb edir və əlavə edib ki, davamlı sülh yalnız Kəşmir məsələsinin Kəşmir xalqının gözləntilərinə və BMT Təhlükəsizlik Şurasının qətnamələrinə uyğun həlli ilə mümkündür.

Dar həmçinin Pakistanın Kəşmir xalqına "mənəvi, siyasi və diplomatik dəstəyini" davam etdirəcəyini bildirib və xüsusilə BMT başda olmaqla beynəlxalq ictimaiyyəti problemin sülh yolu ilə həlli üçün daha fəal təşəbbüslər göstərməyə çağırıb.