Azərbaycan News Agency

İsrail Xarici İşlər Nazirliyi İran rejiminin pul axınını təmin etmək məqsədilə qlobal maliyyələşdirmə şəbəkələri yaratdığını və terror fəaliyyətlərinin maliyyələşdirilməsində müxtəlif üsullardan istifadə edildiyini iddia edib.

Nazirliyin açıqlamasında, “Terrorizm pulla qidalanır və İran rejimi pulun axınını təmin etmək üçün qlobal şəbəkələr yaradıb” ifadələri yer alıb.

İsrail Xarici İşlər Nazirliyi Hamas və Hizbullah kimi təşkilatların maliyyələşdirilməsində banklardan, havala sistemlərindən, xeyriyyə təşkilatlarından, mütəşəkkil cinayətkarlıqdan və kriptovalyutalardan istifadə edildiyini iddia edib, süni intellektin də terrorun maliyyələşdirilməsində yeni bir sahə kimi ortaya çıxdığını bildirib.

Açıqlamada yeni ITIC araşdırmasının terrorun necə maliyyələşdirildiyini və təhdidin hansı istiqamətdə irəlilədiyini ortaya qoyduğu qeyd edilib.