Azərbaycan News Agency

Avropa İttifaqının Böhranların İdarə Edilməsi üzrə komissarı Haca Lahbib İnteqrə Olunmuş Ərzaq Təhlükəsizliyi Mərhələ Təsnifatı (IPC) hesabatını dəyərləndirib.

Lahbib bildirib ki, hesabata əsasən Qəzzadakı humanitar vəziyyət kritik həddə çatıb və 2026-cı il ərzində təxminən 1,4 milyon fələstinlinin ciddi ərzaq çatışmazlığı ilə üzləşəcəyi gözlənilir. Bu isə Qəzzada hər 10 nəfərdən 9-na təsir edəcək.

O vurğulayıb ki, atəşkəsdən sonra humanitar yardımların artması ərzaq təhlükəsizliyinin yaxşılaşmasına kömək etsə də, vəziyyət hələ də son dərəcə ağırdır və Qəzza əhalisinin böyük əksəriyyəti humanitar yardıma ehtiyac duyur.

Lahbib əlavə edib ki, Avropa İttifaqı humanitar tərəfdaşları ilə birlikdə fələstinlilərə həyati əhəmiyyətli dəstək göstərməyə davam edir və humanitar yardımların Qəzzanın bütün ərazisinə tam və maneəsiz çatdırılmasının təcili olduğunu vurğulayıb.