Azərbaycan News Agency

Böyük Britaniyanın Baş naziri Keyr Starmerin Dauninq Striti tərk etmək qərarından sonra Baş nazir müavini Devid Lammi Starmerin siyasi fəaliyyəti, partiyadakı dəyişikliklər və hökumətin nailiyyətləri ilə bağlı bəyanat yayıb.

Lammi bildirib ki, Starmeri uzun illərdir tanıyır və onun prinsipial mövqeyini yüksək qiymətləndirir: “Mən Keyri vəkil olduğu dövrdən tanıyıram. O zaman da, indi də prinsipial insan olub və bütün karyerası boyu bu ölkəyə qarşı dərin ictimai xidmət və vəzifə hissi ilə hərəkət edib. O, Leyboristlər Partiyasını dəyişdirdi, antisemitizmi aradan qaldırdı, etimadı bərpa etdi və partiyamızı yenidən seçilə bilən vəziyyətə gətirdi. Britaniyanı daha yaxşı istiqamətdə dəyişdirmək üçün tarixi mandat qazandı və ən əsası, bu vədini yerinə yetirdi.”

Lammi hökumət dövründə həyata keçirilən islahatlar və əldə edilən uğurlardan danışaraq qeyd edib: “Keyrin rəhbərliyi altında bu Leyborist hökuməti iqtisadiyyatımıza sabitlik qaytardı, NHS gözləmə siyahılarını azaltdı, kirayəçilərin hüquqlarını yaxşılaşdırdı, məhkəmə və həbsxanalarda bizə miras qalan böhranı aradan qaldırmağa başladı, kiçik qayıqlarla keçidləri azaltdı, gəncləri onlayn mühitdə qorudu, yarım milyon uşağı yoxsulluqdan çıxardı və Britaniyanın dünyadakı mövqeyini bərpa etdi.”

Böyük Britaniyanın beynəlxalq mövqeyinə və Starmerin irsinə toxunan Lammi sözlərini belə yekunlaşdırıb: “O, Britaniyanı yenidən Avropanın mərkəzinə qaytardı, Ukraynanın yanında qətiyyətlə dayandı və müttəfiqlərimizlə münasibətləri yenidən qurdu. Dəyişiklik vəd edildi, dəyişiklik uğrunda mübarizə aparıldı və dəyişiklik həyata keçirildi. Bu, Keyr Starmerin irsidir və mən bunda rol oynadığım üçün son dərəcə qürur duyuram.”