Azərbaycan News Agency

Litvanın xarici işlər naziri Kestutis Budris sosial media hesabında yaydığı açıqlamada Qara dənizdə, Rumıniya sahilləri yaxınlığında ticarət gəmisinin hücuma məruz qaldığını bildirib. Hücum nəticəsində bir dənizçinin həyatını itirdiyini, bir neçə digər dənizçinin isə itkin düşdüyünü qeyd edən Budris həlak olanların ailələri və hadisədən zərər çəkənlərlə həmrəy olduqlarını ifadə edib.

Budris mülki gəmilərə hücumların gəmiçilik azadlığını və qaydalara əsaslanan beynəlxalq nizamı hədəf aldığını bildirib. O, Litvanın Rumıniya ilə həmrəy olduğunu vurğulayıb.

Budris Rusiyanın təcavüzkar hərəkətlərinin daha ağır nəticələrə səbəb olmalı olduğunu bildirərək sanksiyaların sərtləşdirilməsinə, təzyiqin artırılmasına, NATO-nun şərq cinahında və bütövlükdə Avropada təhlükəsizlik və dayanıqlılığa yönəlmiş investisiyaların gücləndirilməsinə çağırıb.