Azərbaycan News Agency

Fransa Prezidenti Emmanuel Makron sosial media hesabında paylaşdığı açıqlamada Marseldə şəhər meri, yerli rəhbər şəxslər, prefektura nümayəndələri, sahibkarlar, şəhər sakinləri və daxili təhlükəsizlik qüvvələrinin əməkdaşları ilə görüşdüyünü bildirib.

Makron oktyabrın 17-də baş vermiş hadisələrdən çıxarılan nəticələr əsasında zəruri tədbirlərin görüldüyünü, 24 oktyabr, şənbə günü isə nümayiş keçirmək hüququnun qorunduğunu və ictimai asayişin təmin edildiyini qeyd edib. O, təhlükəsizlik qüvvələrinə və yerli rəhbərliyə gördükləri işlərə görə təşəkkür edərək, şəhərdə sakitliyin qorunması üçün zəruri təhlükəsizlik tədbirlərinin davam etdiriləcəyini bildirib.

Makron nümayiş azadlığı, şəhər sakinlərinin təhlükəsizliyi və iqtisadi fəaliyyətin bərpası arasında tarazlıq yaratmaq məqsədilə şəhər mərkəzindən kənarda daimi nümayiş marşrutlarının müəyyənləşdirilməsi üzərində iş aparıldığını açıqlayıb. O, əsas prioritetlərin sakitliyin qorunması, müəssisələrin yenidən açılması və gündəlik həyatın normal vəziyyətə qayıtması olduğunu vurğulayıb.

Makron talan edilmiş və ya hadisələr səbəbindən fəaliyyətini dayandırmaq məcburiyyətində qalmış müəssisələr üçün yerli hakimiyyət orqanları və özəl sektorla əməkdaşlıq çərçivəsində müxtəlif dəstək tədbirlərinin, o cümlədən yardım fondunun işə salındığını bildirib. O, kompensasiya ödənişlərinin sürətləndirilməsi, yeni sifarişlərin maliyyələşdirilməsinə yardım göstərilməsi və gəlir itkisinə məruz qalmış sahibkarların dəstəklənməsi üçün sığorta şirkətləri və banklarla birgə iş aparıldığını qeyd edib.

Makron yaşayış xərclərinin yüksək olması, eləcə də orta məktəb və universitet tələbələrinin gələcəkləri ilə bağlı narahatlıqlarının haqlı olduğunu və konkret cavablar tələb etdiyini bildirərək, hökumətin həmin gün ərzində müvafiq tədbirləri açıqlayacağını elan edib. Bununla belə, o vurğulayıb ki, bu narahatlıqlar zorakılığa, talana və ya dövlət qurumlarına qarşı hücumlara haqq qazandıra bilməz.

Prezident seçkilərinə altı ay qalmış Fransanın zorakılıq dövrü əvəzinə demokratik müzakirəyə ehtiyac duyduğunu qeyd edən Makron müxtəlif fikirlərin sərbəst ifadə olunmasının, təkliflərin müzakirə edilməsinin və vətəndaşların öz gələcəklərini azad şəkildə seçə bilməsinin vacibliyini vurğulayıb. Makron hökumətin ictimai asayişi təmin etmək, demokratik müzakirə mühitini qorumaq və cəmiyyətin birliyini saxlamaq istiqamətində üzərinə düşən məsuliyyəti yerinə yetirəcəyini bildirib.