Azərbaycan News Agency

NASA Nancy Grace Roman Kosmik Teleskopunun buraxılışa hazırlığı çərçivəsində mühüm mərhələnin tamamlandığını açıqlayıb.

Açıqlamaya görə, texniklər iyulun 25-də Floridadakı Kennedi Kosmik Mərkəzində yerləşən obyektdə teleskopa təxminən 290 qallon hidrazin yanacağı doldurublar.

Buraxılışdan sonra Roman Kosmik Teleskopunun Yerdən təxminən 1 milyon mil uzaqlıqda yerləşən Günəş-Yer L2 Laqranj nöqtəsinə çatmaq üçün hərəkət sistemindən istifadə edəcəyi bildirilib. Teleskopun burada beşillik əsas missiyasını yerinə yetirməsi, malik olduğu yanacaq sayəsində missiyanın daha beş il uzadılmasının mümkün olması qeyd edilib.

NASA teleskopun Günəş panellərinin də buraxılışdan əvvəl yoxlamalardan keçirildiyini və yanacaqla doldurulduqdan sonra raketin yuxarı mərhələsinə birləşdirilərək qoruyucu yük örtüyünün içərisinə yerləşdiriləcəyini bildirib.

Roman Kosmik Teleskopunun minlərlə ekzoplaneti araşdırmaqla yanaşı, qaranlıq enerji və kainatın genişlənmə sürəti ilə bağlı tədqiqatlarda istifadə ediləcəyi qeyd olunub.

NASA Roman Kosmik Teleskopunun avqustun 30-da Kennedi Kosmik Mərkəzindən SpaceX Falcon Heavy raketi ilə buraxılmasının planlaşdırıldığını açıqlayıb.