Azərbaycan News Agency

Qətərin Baş naziri və Xarici İşlər naziri Şeyx Məhəmməd bin Əbdürrəhman Al Sani ilə Pakistanın Baş naziri Şahbaz Şərif arasında telefon danışığı baş tutub.

Açıqlamaya görə, danışıq zamanı iki ölkə arasındakı ikitərəfli münasibətlər və əməkdaşlığın gücləndirilməsinə yönəlmiş addımlar müzakirə olunub. Tərəflərin mövcud əməkdaşlığın daha da inkişaf etdirilməsi ilə bağlı fikir mübadiləsi apardığı bildirilib.

Danışıq zamanı regional inkişaflar və təhlükəsizlik məsələləri də gündəmə gəlib. Xüsusilə gərginliyin azaldılması və sabitliyin qorunmasına yönəlmiş diplomatik səylərin əhəmiyyəti vurğulanıb.

Qətər tərəfi ABŞ ilə İran arasında əldə olunan atəşkəs prosesində Pakistanın və digər vasitəçi ölkələrin roluna görə təşəkkür edərək bu təşəbbüsləri yüksək qiymətləndirdiyini bildirib.

Qətərin regional böhranların həllində dialoq və diplomatiyaya üstünlük verən bütün səyləri dəstəkləməyə davam edəcəyi mesajı paylaşılıb.

Tərəflərin davamlı sülh və sabitliyin təmin olunması üçün danışıqlar prosesinin davam etdirilməsinin vacibliyi ilə bağlı ortaq mövqe bildirdiyi qeyd olunub.