Azərbaycan News Agency

Pakistan Xarici İşlər Nazirliyi Maldiv Prezidenti Məhəmməd Muizzunun 20-22 oktyabr tarixlərini əhatə edən rəsmi səfər çərçivəsində paytaxt İslamabada gəldiyini bildirib. Muizzunu birinci xanım Sacidə Məhəmməd, kabinet üzvləri və yüksək vəzifəli rəsmilərdən ibarət nümayəndə heyəti müşayiət edib.

Pakistanın dənizçilik məsələləri üzrə federal naziri Məhəmməd Cüneyd Ənvər Çaudhri və Federal Təhsil və Peşə Təhsili Nazirliyi üzrə dövlət naziri Vaciha Qəmər Muizzu və onu müşayiət edən nümayəndə heyətini hava limanında qarşılayıblar.

Nazirliyin açıqlamasında Maldiv Prezidentinin 11 ildən sonra Pakistana həyata keçirdiyi ilk səfərin iki ölkə arasında diplomatik münasibətlərin qurulmasının 60-cı ildönümünə təsadüf etməsi səbəbindən xüsusi əhəmiyyət daşıdığı vurğulanıb.

Səfərin Pakistan ilə Maldiv arasında köklü dostluq münasibətlərini və müxtəlif sahələrdə ikitərəfli əməkdaşlığı daha da gücləndirmək istiqamətində ortaq qətiyyəti əks etdirdiyi bildirilib.