Azərbaycan News Agency

Ukrayna Prezidenti Volodimir Zelenski Osloda ABŞ və avropalı tərəfdaşları ilə mühüm danışıqlar apardıqlarını bildirib. O, görüşlərdə ABŞ nümayəndəsi Stiv Uitkoffun iştirak etdiyini, Cared Kuşnerin isə onlayn şəkildə qoşulduğunu qeyd edib.

Zelenski Ukraynanın ABŞ-ın enerji sahəsində atəşkəs təklifini dərhal dəstəklədiyini, lakin Rusiyanın hücumlarını davam etdirdiyini bildirib. O, Rusiyanın Ukraynanın enerji infrastrukturuna hücumları dayandıracağı təqdirdə Rusiyanın enerji sektorundakı həssas obyektlərinə hücum etməmək üçün müxtəlif variantlar təklif etdiklərini, lakin Rusiya Prezidenti Vladimir Putinin bu təklifi qəbul etmədiyini qeyd edib.

Sülhə nail olmaq üçün konkret ideyalarının olduğunu bildirən Zelenski bu məsələdə avropalı tərəfdaşları ilə birgə hərəkət etdiklərini və ABŞ-dan həmin təklifləri Rusiyaya çatdırmasını istədiklərini söyləyib.

Zelenski liderlərin birbaşa müzakirə etməli olduğu məsələlərlə bağlı mümkün üçtərəfli liderlər görüşünün də gündəmdə olduğunu bildirib. O, Stiv Uitkoffun ertəsi gün Rusiyaya səfər edəcəyini və Putinin cavabının gözlənildiyini ifadə edib.