Azərbaycan News Agency

Pakistan Xarici İşlər Nazirliyinin açıqlamasına əsasən, Baş nazirin müavini və xarici işlər naziri senator Məhəmməd İshaq Dar Filippinin paytaxtı Manilada ASEAN Regional Forumu öncəsi Misirin xarici işlər, miqrasiya və xaricdə yaşayan misirlilər naziri Bədr Abdelattinin ev sahibliyi etdiyi şam yeməyində iştirak edib.

Görüşdə Pakistan ilə Misir arasında ticarət, investisiya, iqtisadi əməkdaşlıq və çoxtərəfli platformalarda koordinasiyanın gücləndirilməsi məsələləri müzakirə olunub.

Tərəflər Yaxın Şərqdəki vəziyyəti də qiymətləndirərək gərginliyin azaldılması, dialoqun davam etdirilməsi, bütün dövlətlərin suverenliyi və ərazi bütövlüyünə hörmət göstərilməsinin vacibliyini vurğulayıblar. Regional qeyri-sabitliyin qlobal dəniz ticarətinə, enerji təhlükəsizliyinə və dünya iqtisadiyyatına təsirləri də müzakirə olunub.

Açıqlamada qeyd olunub ki, iki nazir Fələstindəki vəziyyətlə bağlı fikir mübadiləsi aparıb, mülki şəxslərə qarşı zorakılığı və işğal altındakı İordan çayının Qərb sahilində qanunsuz məskunlaşma fəaliyyətlərini rədd etdiklərini bir daha bəyan ediblər. Tərəflər həmçinin Qahirədə keçirilmiş son Regional Dördlük məsləhətləşmələrini dəyərləndirib, sülh, sabitlik və regional əməkdaşlığın dəstəklənməsi istiqamətində ortaq qətiyyətlərini təsdiqləyiblər.