Azərbaycan News Agency

Xorvatiyanın Baş naziri Andrey Plenkoviç Roma icmasının həyat keyfiyyətinin artırılmasına yönəlmiş 21 layihə üzrə müqavilələrin imzalandığını bildirib. Plenkoviç qeyd edib ki, bu layihələr hökumətin davam edən investisiyalarının bir hissəsidir.

Son 10 il ərzində milli azlıqlar üçün əməliyyat proqramları və onların nümayəndələri ilə əməkdaşlıq çərçivəsində yaşayış şəraitinin yaxşılaşdırılması istiqamətində çalışdıqlarını bildirən Plenkoviç, Roma icmasının yaşadığı ərazilər üçün xüsusi proqram çərçivəsində 2022-ci ildən bəri 12 milyon avrodan çox investisiya yatırıldığını qeyd edib.

İnvestisiyaların infrastrukturun inkişaf etdirilməsinə və mənzil-məişət şəraitinin yaxşılaşdırılmasına yönəldiyini bildirən Plenkoviç, Roma uşaqlarının təhsil sistemində daha uzun müddət qalmasının onların cəmiyyətə uğurlu inteqrasiyası baxımından mühüm əhəmiyyət daşıdığını vurğulayıb.