Azərbaycan News Agency

Xorvatiyanın Baş naziri Andrey Plenkoviç Srebrenitsa Soyqırımının ildönümü münasibətilə yaydığı müraciətdə bosniyalı qurbanları ehtiramla yad etdiklərini və baş vermiş qətliamı bir daha açıq və qəti şəkildə pislədiklərini bildirib.

Plenkoviç qeyd edib ki, Srebrenitsa qurbanları yaddaşlarda həm xəbərdarlıq, həm də insanlığın, sağlam düşüncənin və qarşılıqlı hörmətin parçalanmadan üstün tutulmasının vacibliyini xatırladan daimi çağırış kimi qalacaq.

Xatirə mədəniyyətinin qorunmasının əhəmiyyətini vurğulayan Plenkoviç zorakılığa yer olmayan və hər kəsin ləyaqətinə hörmət göstərilən cəmiyyətlərin qurulmasının ortaq məsuliyyət olduğunu bildirib.

Plenkoviç əlavə edib ki, Xorvatiya Bosniya və Herseqovinada sülhü, sabitliyi və Avropa perspektivini dəstəkləməyə davam edəcək, ölkənin inkişafı isə dialoq, qarşılıqlı anlaşma və əməkdaşlıq əsasında həyata keçirilməlidir.