Azərbaycan News Agency

Qətərin Baş naziri və xarici işlər naziri Şeyx Məhəmməd bin Əbdürrəhman bin Casim Al Sani Qahirədə Misirin xarici işlər, miqrasiya və xaricdə yaşayan misirlilər naziri Badr Abdelatty ilə görüşüb.

Görüşdə iki ölkə arasında əməkdaşlıq münasibətləri, onların dəstəklənməsi və inkişaf etdirilməsi yolları müzakirə olunub, müxtəlif sahələrdə birgə fəaliyyətin və mövqelərin uzlaşdırılmasının gücləndirilməsi məsələləri nəzərdən keçirilib.

Tərəflər yüksək səviyyəli səfərlərin, davamlı koordinasiya və məsləhətləşmələrin yaratdığı dinamikanı əsas götürərək ikitərəfli münasibətləri inkişaf etdirmək əzmlərini bir daha təsdiqləyiblər. Birgə Ali Komitənin müntəzəm keçirilməsinin və onun yeddinci sessiyasının nəticələrinin konkret addımlara çevrilməsinin vacibliyi vurğulanıb.

Görüşdə iqtisadi və investisiya əlaqələrində əldə olunan irəliləyişə diqqət çəkilib, iki ölkə arasında ticarət dövriyyəsinin 2025-ci ildə 80 faiz artdığı və Qətərin Misirdəki investisiyalarının artmaqda davam etdiyi bildirilib. Süveyş Kanalı İqtisadi Zonasında Qətərin birbaşa sərmayəsi ilə dayanıqlı aviasiya yanacağı istehsalı layihəsinin başlanması da iqtisadi əməkdaşlıqdakı irəliləyişlər sırasında qeyd olunub.

Tərəflər həmçinin Qəzza zolağında və işğal altındakı Fələstin ərazilərindəki hadisələri, eləcə də regional gərginliyin azaldılmasına yönəlmiş diplomatik səyləri müzakirə ediblər. İsrailin Qəzzada münaqişənin sona çatdırılmasına və Fələstin dövlətinin yaradılmasına yönəlmiş yol xəritəsini rədd etməsini pisləyən tərəflər regional təhlükəsizliyin və sabitliyin dəstəklənməsi üçün koordinasiyanın davam etdirilməsinin vacibliyini vurğulayıblar.

Görüşdə həmçinin dəniz təhlükəsizliyi və naviqasiya azadlığı, Livanın təhlükəsizliyi və suverenliyi, Sudandakı hadisələr və Afrika Buynuzundakı vəziyyət müzakirə olunub. Qətər və Misirin regional və beynəlxalq proseslərlə bağlı sıx koordinasiya və məsləhətləşmələri davam etdirəcəyi bildirilib.