Azərbaycan News Agency

Qətər Xarici İşlər Nazirliyi bildirib ki, dövlət naziri Məhəmməd bin Əbdüləziz bin Saleh Əl-Xulaifi Səudiyyə Ərəbistanının xarici işlər nazirinin Livan məsələləri üzrə müşaviri Şahzadə Yezid bin Məhəmməd bin Fəhd Əl-Fərhan ilə telefon danışığı aparıb.

Telefon danışığı zamanı tərəflər iki ölkə arasında əməkdaşlığın inkişafını və Livandakı son vəziyyəti müzakirə ediblər.

Tərəflər həmçinin Livan hökumətinin məcburi köçkünlərin üzləşdiyi problemlərin həlli, onların təhlükəsiz qayıdışı üçün şəraitin yaradılması və humanitar yaşayış şəraitinin qorunması istiqamətində gördüyü işləri nəzərdən keçiriblər.

Əl-Xulaifi və Əl-Fərhan Livan dövlətinin öz institutlarını gücləndirmək və ölkə üzrə hakimiyyətini möhkəmləndirmək istiqamətində atdığı addımlardan məmnunluqlarını ifadə ediblər.