Azərbaycan News Agency

BMT-nin Baş katibi Antonio Quterreş COP31 Liderlər Sammitinin açılış mərasimindəki çıxışında iqlim böhranı ilə mübarizədə daha sürətli addımlar atılmasının vacibliyini vurğulayıb.

Quterreş 2025-ci ildə qlobal emissiyaların rekord səviyyəyə çatdığını, son dörd ilin isə müşahidələr tarixində ən isti illər arasında yer aldığını bildirib. Paris Sazişində nəzərdə tutulan 1,5 dərəcə hədəfinə nail olmağın getdikcə çətinləşdiyini qeyd edən Quterreş buna baxmayaraq, mübarizədən imtina edilməməsinin vacibliyini vurğulayıb.

Fosil yanacaqlardan imtinanın əhəmiyyətinə diqqət çəkən Quterreş bildirib: "Dinozavrlardan imtina etdiyimiz kimi, fosil yanacaqlardan da imtina etməliyik. Lakin bu, öz-özünə baş verməyəcək. Dinozavrların lobbisi yox idi, amma fosil yanacaqların lobbisi var."

Quterreş fosil yanacaq lobbilərinin elmi faktları təhrif edərək siyasətlərin və iqlim tədbirlərinin həyata keçirilməsini gecikdirdiyini bildirib. Bərpa olunan enerji sahəsinə investisiyaların artırılmasının vacibliyini qeyd edən Quterreş 2035-ci ilə qədər qlobal bərpa olunan enerji gücünün 2022-ci il səviyyəsi ilə müqayisədə üç dəfə artırılmasına çağırıb.

İqlim maliyyələşdirilməsinin əhəmiyyətinə də toxunan Quterreş inkişaf etmiş ölkələrin 2035-ci ilə qədər hər il 300 milyard dollar iqlim maliyyəsi təmin etməli və iqlim dəyişikliyinə uyğunlaşma üçün maliyyələşdirməni ən azı üç dəfə artırmalı olduğunu bildirib. Quterreş iqlim böhranının təsirləri ilə mübarizə aparan inkişaf etməkdə olan ölkələrin maliyyə və texnoloji dəstəyə ehtiyac duyduğunu vurğulayıb.

Quterreş çıxışında "Artıq hərəkətə keçməyin vaxtıdır" deyərək ölkələri daha sürətli addımlar atmağa çağırıb. Gələn ildən etibarən BMT-nin Baş katibi vəzifəsində olmayacağını bildirən Quterreş iqlim böhranı ilə mübarizəsini davam etdirəcəyini qeyd edib.