Azərbaycan News Agency

ABŞ dövlət katibi Marko Rubio Kuba kommunist rejiminə silah tədarükü ilə əlaqəli olan 5 Kuba qurumu və 8 şəxsə qarşı sanksiya qərarı qəbul edildiyini bildirib.

Kuba hökumətini terrorizmi dəstəkləməkdə ittiham edən Rubio deyib: "Kuba kommunist rejimi Amerikaya casusluq edən, zorakılığı dəstəkləyən solçu radikalları silahlandıran, zəhərli marksist ideologiyanı yayan və sahillərimizdən cəmi 90 mil uzaqlıqda Rusiya, Çin və İran üçün baza rolunu oynayan terrorizmi dəstəkləyən dövlətdir."

Trampın yanaşmasına diqqət çəkən Rubio bildirib: "Prezident Trampın da dediyi kimi: Amerika Birləşmiş Ştatları qapımızın önündə düşmən hərbi, kəşfiyyat və terror əməliyyatlarına ev sahibliyi edən quldur dövlətə güzəşt etməyəcək."

Sanksiyaların əhatə dairəsi ilə bağlı xəbərdarlıq edən Rubio açıqlamasını belə yekunlaşdırıb:

"Bu sanksiyaya məruz qalan subyektləri dəstəkləyən, maliyyələşdirən və ya onlara xidmət göstərən hər kəs özü də sanksiya riski altındadır. Bu qurumlara xidmət göstərən və ya onlar üçün vəsait saxlayan xarici banklar və digər şirkətlər bu fəaliyyətlərini dərhal dayandırmalıdır."