Azərbaycan News Agency

Finlandiya Prezidenti Aleksandr Stubb Venesuelada yaşanan siyasi böhran və Finlandiyanın bu məsələdəki rəsmi mövqeyi ilə bağlı açıqlama verib.

Maduro hakimiyyətinin legitimliyini tənqid edən Stubb bildirib: “Nikolas Maduro rejimi uzun müddətdir qeyri-legitimdir. 2024-cü il seçkiləri son dərəcə ədalətsiz olub. Finlandiya AB üzvü kimi bunu daha əvvəl də qeyd etmişdi. Birlik Venesuelaya qarşı sanksiyalar da tətbiq edib.”

Finlandiyanın xarici siyasət prinsiplərini vurğulayan Stubb əlavə edib: “Bütün dövlətlər beynəlxalq hüquqa hörmət etmək və ona əməl etmək məsuliyyətinə malikdir. Bu prinsipin qorunması Finlandiyanın həyati maraqları baxımından mühüm əhəmiyyət daşıyır və xarici siyasətimizin əsas sütunlarından biridir.”

Mövcud vəziyyətin həlli üçün strateji yanaşmanın vacibliyini qeyd edən Stubb deyib: “Hazırda demokratik hökumətə keçidin dəstəklənməsi önəmlidir. Vəziyyəti yaxından izləyirik.”