Azərbaycan News Agency

ABŞ Prezidenti Donald Tramp Livan və İsrail arasında sülh prosesi və Vaşinqtonda aparılan diplomatik təmaslar barədə açıqlama verib.

Atəşkəsin detalları ilə bağlı danışan Tramp deyib: “Az əvvəl Livan Prezidenti Cozef Aun və İsrailin Baş naziri Benyamin Netanyahu ilə əla görüşlər keçirdim. Bu iki lider ölkələri arasında sülhü təmin etmək üçün Şərq Vaxtı ilə saat 17:00-da rəsmi olaraq 10 günlük atəşkəsə başlamağa razılaşdılar.”

Aparılan danışıqlara toxunan Tramp bildirib: “Çərşənbə axşamı, 34 ildən sonra ilk dəfə olaraq iki ölkə burada, Vaşinqtonda, dövlət katibimiz Marko Rubionun iştirakı ilə bir araya gəldi. Mən vitse-prezident JD Vensə və dövlət katibi Rubioga, Baş Qərargah rəisi Den ‘Razin’ Keyn ilə birlikdə İsrail və Livan arasında davamlı sülhün təmin olunması üçün işləmək tapşırığını verdim.”

Sülh səylərinə dair qətiyyətini vurğulayan Tramp əlavə edib: “Dünyanın müxtəlif yerlərində 9 müharibəni həll etmək mənim üçün şərəf olub və bu, mənim 10-cu müharibəm olacaq – gəlin, işi başa çatdıraq!”