Azərbaycan News Agency

Amerika Birləşmiş Ştatlarının (ABŞ) Prezidenti Donald Tramp Kanada ilə aparılan danışıqlarda razılaşmanın əldə olunmasına yaxın olduqlarını bildirərək enerji və kənd təsərrüfatı sahələrində planlaşdırılan əməkdaşlıq barədə açıqlamalar verib.

Kanada ilə yaxşı bir razılaşma üzərində işlədiklərini qeyd edən Tramp deyib: “Bizim çox yaxşı bir razılaşma konsepsiyamız var. Hazırda razılaşmaya çox yaxınıq”. Keystone boru kəməri ilə bağlı planı da açıqlayan Tramp bildirib: “Onlar boru kəmərini inşa edəcəklər. Bunun pulunu özləri ödəyəcək, bütün xərcləri qarşılayacaqlar. Biz isə onlara marşrutu təqdim edəcəyik və marşrut artıq böyük ölçüdə müəyyən edilib”.

Amerikalı fermerlərin Kanadaya məhsul göndərərkən yüksək gömrük tarifləri ilə üzləşdiyini bildirən Tramp yeni razılaşma ilə bu tariflərin ləğv ediləcəyini iddia edib. Tramp deyib: “Fermerlərimiz Kanadaya məhsul göndərmək üçün çox yüksək gömrük rüsumları ödəyirdilər. Bütün bu tariflər aradan qaldırılacaq. Heç bir gömrük rüsumu olmayacaq. Razılaşmanın bir hissəsi də fermerlərimizin heç bir gömrük rüsumu ödəməməsi olacaq”.

Tramp həmçinin Senat seçkilərinin əhəmiyyətinə toxunaraq Müsəlman Qardaşlar təşkilatı ilə bağlı açıqlamalar verib. Təşkilatın partiya daxilindəki təsiri barədə iddialarını səsləndirən Tramp deyib: “Biz Senatda qalib gəlməliyik. Müsəlman Qardaşların nəzarəti ələ keçirməsinə icazə verə bilmərik. Onların bir, iki və ya üç səsi olduqda, faktiki olaraq partiyaya nəzarət etdiklərini düşünürlər. Partiya onların tələblərini yerinə yetirməyə məcbur olur. Onlar partiyanı təhdid edə və şantaj yolu ilə istədiklərini əldə edə bilərlər”.