Azərbaycan News Agency

Estoniyanın xarici işlər naziri Margus Tsahkna Rusiyadakı Dövlət Duması seçkiləri ilə bağlı qiymətləndirmə verib. Tsahkna səsvermədən əvvəlki dövrdə Kremlin hədə-qorxu, məhdudlaşdırıcı qeydiyyat şərtləri, inzibati təzyiq və cinayət təqibləri vasitəsilə real müxalifəti sistemli şəkildə prosesdən kənarlaşdırdığını iddia edib.

Tsahkna bütün bu tədbirlərin hakimiyyətin qorunmasına və seçicilərin real seçim etməsinin qarşısının alınmasına xidmət etdiyini bildirərək, Yabloko partiyasının prosesdən kənarda saxlanılmasını bu səylərin konkret nümunələrindən biri kimi göstərib.

Tsahkna etibarlı beynəlxalq müşahidəçilərin olmamasının da seçki prosesinin Putinin hakimiyyət üzərində nəzarətini qorumağa yönəlmiş bir vasitə olduğu barədə qiymətləndirməni gücləndirdiyini bildirib.

Rusiyanın qanunsuz şəkildə işğal etdiyi Ukrayna ərazilərində qondarma seçkilərin keçirilməsini qətiyyətlə pislədiklərini bildirən Tsahkna, “Ukraynanın suverenliyinin və ərazi bütövlüyünün bu cür açıq şəkildə pozulmasına qarşı aydın və koordinasiyalı cavab verilməsini təmin etmək üçün tərəfdaşlarımızla sıx əməkdaşlıq edirik.” ifadələrini işlədib.