Azərbaycan News Agency

Ukrayna Prezidenti Volodimir Zelenski Zaporijjya və Xarkov bölgələrinə Rusiyanın hücumları ilə bağlı açıqlama verib. Zelenski hücumlar nəticəsində yaşayış binalarının, bir universitet obyektinin, ticarət mərkəzinin və qazanxananın zərər gördüyünü bildirib.

Zelenski Zaporijjyada doqquzmərtəbəli yaşayış binalarının, bir universitet obyektinin, bir ticarət mərkəzinin və qazanxananın zərər gördüyünü bildirərək, “İndiyədək beş nəfərin yaralandığı bildirilir və bəzi sakinlər təxliyə edilib.” ifadələrini işlədib.

Xarkov bölgəsinin Lozova şəhərində isə pilotsuz uçuş aparatının hücumu nəticəsində bir qadının öldüyünü bildirən Zelenski hadisə zamanı daha üç nəfərin yaralandığını deyib. Zelenski həyatını itirən qadının yaxınlarına başsağlığı verib və rus qüvvələrinin axşam saatlarından gecə boyu Ukraynanın 10 bölgəsini hədəfə aldığını bildirib.

Zelenski, “Rusiya gərginliyi artırmaq siyasətindən geri addım atmır və müharibəni genişləndirməyə hazır olduğuna dair çoxlu əlamətlər verir.” deyib. Müharibənin qlobal sabitliyi sarsıtdığını bildirən Zelenski təcavüzkara təzyiqin davam etdirilməli olduğunu və uzunmüddətli sanksiyaların bu təzyiqin bir hissəsi olduğunu qeyd edib.

Diplomatiyanın da təzyiqlə paralel şəkildə aparılmalı olduğunu vurğulayan Zelenski Birləşmiş Millətlər Təşkilatının Baş Assambleyasında birgə səylərlə sülhün necə təmin edilə biləcəyinin müzakirə olunacağını bildirərək, bunun bütün liderlərin üzərində işləməli olduğu əsas vəzifə olduğunu deyib.