Azərbaycan News Agency

Ukrayna Xarici İşlər Nazirliyinin açıqlamasına görə, Rusiya tammiqyaslı müharibənin başlanmasından bəri Kiyevi hədəf alan ən böyük ballistik raket hücumlarından birini həyata keçirib.

Bildirilib ki, gecə ərzində Ukrayna ərazisinə 40-dan çox müxtəlif tipli raket və 120 hücum dronu buraxılıb, raketlərin böyük hissəsi birbaşa paytaxt Kiyevi hədəf alıb. Hücum nəticəsində bir nəfər həyatını itirib, azı 16 nəfər yaralanıb.

Hücumun yaratdığı dağıntıların aradan qaldırılması üçün təxminən 600 fövqəladə hallar əməkdaşının hadisə yerlərində fəaliyyətini davam etdirdiyi bildirilib. Həmçinin açıqlanıb ki, təkcə bu həftə ərzində Rusiya Ukraynaya qarşı təxminən 1.450 hücum dronu, 1.640-dan çox idarəolunan aviasiya bombası və 99 raket buraxıb. Bu hücumlar nəticəsində mülki şəxslər arasında ölən və yaralananlar olub, həmçinin ondan çox bölgədə yaşayış evləri və kritik infrastruktur zədələnib.