Azərbaycan News Agency

Dünya Ərzaq Proqramı (WFP) bildirir ki, son dörd həftədə Qəzzaya cəmi 9 min ton ərzaq yardımı göndərilib.

Bu miqdarın 2,1 milyon ac insanın ehtiyacının yalnız kiçik bir hissəsini qarşıladığı qeyd olunub və əlavə edilib: “Daha da dəhşətlisi odur ki, bir çox insan bu yardıma çatmağa çalışarkən həyatını itirib. Yalnız ərzaq paylanmasının geniş şəkildə artırılması vəziyyəti sabitləşdirə, narahatlıqları azalda və cəmiyyətlərin gələcək yardımlara olan inamını bərpa edə bilər. Təhlükəsiz və etibarlı konvoy marşrutlarına, daha sürətli icazə prosedurlarına, dayanıqlı rabitə xidmətlərinə və əlavə sərhəd-keçid məntəqələrinin açılmasına təcili ehtiyac var.”

Açıqlamada bildirilir ki, aclıq qorxusu və təcili ərzaq ehtiyacı, humanitar yardımları yolda ələ keçirmək ümidi ilə tanınmış yardım yollarında böyük insan kütlələrinin toplanmasına səbəb olub.

“WFP bütün mülki şəxslərin və həyat qurtaran yardım göstərən humanitar işçilərin qorunmasına çağırışını davam etdirir. Atəşkəs dövründə WFP gündə 600-ə yaxın yük maşınının Qəzzaya daxil olmasına nail oldu və aclıq dalğasını azaldıb. Hazırda təcili ehtiyac duyulan məsələ, Qəzza zolağının harasında olursa olsun, ailələrə müntəzəm, davamlı və təhlükəsiz şəkildə əsas ərzaq məhsullarını çatdıra bilmək üçün yeni bir atəşkəsin əldə olunmasıdır.”