Azərbaycan News Agency

Çin hökuməti daxili tələbi stimullaşdırmaq və istehlak potensialını inkişaf etdirmək üçün xidmət istehlakını artıracaq bir sıra tədbirlər qəbul edib. Beş sahəni əhatə edən və 19 maddədən ibarət tədbirlər bu gün Çin Ticarət Nazirliyi də daxil olmaqla doqquz dövlət qurumu tərəfindən birgə elan edilib.

Xidmət sektorunun yüksək səviyyədə açılmasını təşviq etmək məqsədilə Çin internet və mədəniyyət sahələrində açılmanı mərhələli şəkildə irəlilədəcək, həmçinin telekommunikasiya, səhiyyə və təhsil sahələrində pilot proqramları genişləndirəcək.

Bundan əlavə, Çin daha çox beynəlxalq idman tədbirinə ev sahibliyi edəcək, yüksək səviyyəli səhiyyə xidmətləri, əyləncə və turizm sektorlarında bazara çıxışı asanlaşdıracaq və istehlaka yönəlmiş kredit dəstəyini artıracaq. Daha çox xarici investisiya və özəl kapitalı Çinə cəlb etmək üçün məhdudlaşdırıcı tədbirlər azaldılacaq.

Daha çox xarici turistin Çində pul xərcləməsini təşviq etmək üçün addımlar atılacaq. Tək tərəfli vizadan azadolmaların daha çox ölkəni əhatə edəcək şəkildə mütəmadi olaraq genişləndirilməsi, əcnəbilər üçün viza siyasətinin optimallaşdırılması, Çində rabitə, yaşayış və ödəniş əməliyyatlarının asanlaşdırılması və standartlara cavab verən şəxslərə beş illik çoxgirişli viza verilməsi nəzərdə tutulur.