Azərbaycan News Agency

Rusiyanın texnologiya şirkəti Yandex Sasovo və Kaluqadakı məlumat mərkəzlərinin pilotsuz uçuş aparatı (PUA) hücumlarında zərər gördüyünü açıqlayıb.

Şirkətin oktyabrın 9-da yaydığı açıqlamaya görə, oktyabrın 7-dən 8-nə keçən gecə Sasovodakı məlumat mərkəzinə ciddi ziyan dəyib və obyektin fəaliyyəti tamamilə dayandırılıb. Oktyabrın 9-da səhər saatlarında isə Kaluqadakı başqa bir məlumat mərkəzi hücuma məruz qalıb. Bu obyektdəki infrastrukturun bir hissəsi sıradan çıxıb.

Yandex hər iki hadisədə əməkdaşların xəsarət almadığını bildirib. Şirkət fövqəladə hallar qrupları və mütəxəssislərinin ərazidə işlərini davam etdirdiyini, infrastruktura dəyən zərərin miqyasının qiymətləndirildiyini qeyd edib.

Xidmətlərin bərpası üçün işlər davam edir

Məlumat mərkəzlərinin Yandex-in rəqəmsal xidmətləri üçün kritik əhəmiyyət daşıdığını bildirən şirkət yaranmış fasilələrin istifadəçilərin gündəlik fəaliyyətinə və müəssisələrin işinə təsir göstərə biləcəyini qeyd edib.

Yandex xidmətlərin fəaliyyətini davam etdirməsi və fasilələrdən təsirlənən istifadəçilərlə biznes tərəfdaşlarına dəstək göstərilməsi üçün komandaların gecə-gündüz işlədiyini açıqlayıb.

Şirkət məlumat mərkəzlərindəki avadanlıqların nə vaxt yenidən fəaliyyətə başlayacağının hələ məlum olmadığını bildirərək, infrastrukturun vəziyyəti ilə bağlı yeni məlumatlar əldə edildikcə ictimaiyyətin məlumatlandırılacağını qeyd edib.