Azərbaycan News Agency

Ukrayna Prezidenti Volodimir Zelenski sosial media hesabında paylaşdığı açıqlamada Rusiyanın Ukrayna ərazisində enerji infrastrukturuna qarşı hücumlarını davam etdirdiyini bildirib.

Zelenski Rusiyaya məxsus “Şahed” tipli pilotsuz uçuş aparatlarının (PUA) Kiyevdəki istilik-elektrik stansiyasını hədəfə aldığını, Dnipro bölgəsində isə bir gecə ərzində dörd elektrik yarımstansiyasının vurulduğunu qeyd edib. O, Şostka şəhərindəki istilik-elektrik stansiyasının da səhər saatlarında Rusiya PUA-sının hədəfinə çevrildiyini bildirib.

Açıqlamada Dnipro və Xarkov şəhərlərindəki dəmir yolu infrastrukturu ilə yanaşı, Dnipro bölgəsində yerləşən təbii qaz paylama obyektinə də hücum edildiyi qeyd olunub.

280 mindən çox ev təsərrüfatı işıqsız qalıb

Hücumların enerji təchizatında ciddi fasilələrə səbəb olduğunu bildirən Zelenski Dnipro və ətraf ərazilərdə təxminən 200 min, Kiyev vilayətində isə 80 mindən çox ev təsərrüfatının elektrik enerjisinin kəsilməsindən təsirləndiyini açıqlayıb.

O, təmir briqadalarının hücumlardan sonra zədələnmiş infrastrukturu yenidən işlək vəziyyətə gətirmək və elektrik enerjisi təchizatını bərpa etmək üçün işlərini davam etdirdiyini qeyd edib.

Zelenskidən beynəlxalq ictimaiyyətə dəstək çağırışı

Rusiyanın mülki infrastrukturu hədəfə aldığını bildirən Zelenski beynəlxalq ictimaiyyəti Ukraynaya dəstəyi artırmağa çağırıb.

Zelenski Rusiyaya qarşı sanksiyaların gücləndirilməsinin və Ukraynaya yeni dəstək paketlərinin təqdim edilməsinin vacibliyini vurğulayaraq, həqiqi sülhə nail olmaq üçün qətiyyətli addımlar atmağa çağırıb.